Barcelona ចង់​លក់ Lewandowski ដើម្បី​យក​លុយ​មក​ទិញ​ខ្សែបម្រើ​ឆ្នើម​មួយ​រូប

ក្លឹប​អ្នក​មាន​បុណ្យ Barcelona ត្រូវ​បាន​គេ​ដឹង​ថា នឹង​ពិចារណា​រាល់​សំណើរ​ពី​ក្លឹប​ផ្សេងៗ​ដែល​ចង់​បាន Robert Lewandowski ហើយ​ពួក​គេ​ក៏​អាច​លក់​ខ្សែប្រយុទ្ធ​រូប​នេះ​ចេញ​ផង​ដែរ ប្រសិន​បើសំណើរ​នោះ​មាន​តម្លៃ​តាម​ការ​ចង់​បាន​របស់​ខ្លួន។ Barcelona នឹង​យក​ប្រាក់​ដែល​បាន​ពី​ការ​លក់​កីឡាករ​សញ្ជាតិ​ប៉ូឡូញ​រូប​នេះ ដើម្បី​ប្រើប្រាស់​ក្នុង​ការ​ផ្ទេរ​ខ្សែបម្រើ​ឆ្នើម Bruno Guimaraes របស់ Newcastle United។

ក្លឹប​យក្ស​កាតាឡាន់​បាន​ព្យាយាម​ស្វែងរក​ខ្សែបម្រើ​ដែល​មាន​ទេពកោលស្យ​អាច​ជំនួស Sergio Busquets បាន ហើយកាល​ពី​ដើម​រដូវកាល​កន្លង​ទៅ​ពួក​គេ​ចុះ​ហត្ថលេខា​លើ Oriol Romeu និង Ilkay Gundogan។ ជា​លទ្ធផល​កីឡាករទាំង 2 រូប​នេះ ហាក់​មិន​អាច​បំពេញ​បន្ថែម​នៅ​តំបន់​បម្រើ​របស់ Barcelona បាន​ឡើយ ខណៈ​ដែល Gundogan មាន​សមត្ថភាព​ជា​ខ្សែបម្រើ​ប្រយុទ្ធ ច្រើន​ជាង​ការ​លេង​ជា​ខ្សែបម្រើ​កណ្ដាល។

ក្លឹប Barcelona បាន​ពេញ​ចិត្ត​នឹង​សមត្ថភាព​របស់ Bruno Guimaraes ជា​យូរ​មក​ហើយ ប៉ុន្តែ​លទ្ធភាព​នៃ​ការ​ផ្ទេរ​កីឡាករ​សញ្ជាតិ​ប្រេស៊ីល​រូប​នេះ​ហាក់​មាន​ភាព​ពិបាក​ខ្លាំង ស្រប​ពេល​ដែល Guimaraes ទើប​តែ​នឹង​បន្ត​កុងត្រា​ថ្មី​នៅ Newcastle រហូត​ដល់​រដូវក្តៅ​ឆ្នាំ 2028 ផង​ដែរ។

ដោយ​សារ​​តែ​​បញ្ហា​ហិរញ្ញ​វត្ថុ​​របស់​ពួក​គេ ជា​ធម្មតា Barcelona មិន​អាច​ទិញ​កីឡាករ​ថ្លៃៗ​តាម​ចិត្ត​នៃ​ការ​ចង់​បាន​នោះ​ទេ ប៉ុន្តែ​ពួក​គេ​អាច​មាន​ជម្រើស​បញ្ចេញ​កីឡាករ​មួយ​ចំនួន ដើម្បី​កាត់​បន្ថយ​ការ​ចំណាយ និងប្រមូល​បាន​ថវិកា​មួយ​ចំនួន។ យោងតាម FootballTransfers បាន​ឲ្យ​ដឹង​ថា Barcelona បាន​រៀបចំ​ផែនការ ដែល​អាច​ពាក់ព័ន្ធ​នឹង​ការ​លក់ Lewandowski ដែល​ជា​កីឡាករមាន​ប្រាក់​ខែ​​ច្រើន​ជាងគេ​របស់​ក្លឹប ដើម្បី​ធ្វើ​ជា​ចំណែក​មួយ​នៃ​ការ​ទិញ Bruno Guimaraes ដែល​មាន​តម្លៃ​ខ្លួន​ក្បែរ 100 លានផោន។

ប្រភព: Sportsmole