ស្ដួច​ស្ដើង​​ថវិកា! លេច​លឺ​ដំណឹង​ថា Barcelona ចង់​ដោះដូរ Balde ជាមួយ Joao Cancelo

ក្លឹប​អ្នក​មាន​បុណ្យ Barcelona អាច​នឹង​សម្រេច​ចិត្ត​ផ្តល់​ជូន Alejandro Balde ក្នុង​លក្ខខណ្ឌ​ដោះដូរ​ដើម្បី​ទទួល​បាន​កម្មសិទ្ធិ​ផ្ដាច់​មុខ​លើ Joao Cancelo របស់ Manchester City។ យ៉ាង​ណា​មិញ​បច្ចុប្បន្ន Joao Cancelo កំពុង​លេង​ឲ្យ​ក្លឹប Barcelona ក្នុង​នាម​ជា​កីឡាករ​ខ្ចី​ជើង​ពេញ​មួយ​រដូវកាល។

កីឡាករ​សញ្ជាតិ​ព័រទុយហ្គាល់​រូប​នេះ បាន​ក្លាយ​ជា​កីឡាករ​ដ៏​សំខាន់​របស់​លោក Xavi Hernandez ខណៈ​ដែល​គិត​មក​ទល់​នឹង​ពេល​នេះ គាត់​បាន​បង្ហាញ​ខ្លួន​សរុប 21 ប្រកួត​មក​ហើយ និង​បាន​រួម​ចំណែក​ស៊ុត​បញ្ចូលទី 3 គ្រាប់ និង Assists 2 ដង។ ទន្ទឹម​នឹង​នេះ​ដែរ សម្រាប់ Alejandro Balde ក៏​ជា​កីឡាករ​សំខាន់​របស់ Barcelona ដូច​គ្នា ប៉ុន្តែ​តំបន់​ការពារ​ឆ្វេង​ដែល​កាន់​កាប់​ដោយ​ខ្សែការពារ​សញ្ជាតិ​អេស្ប៉ាញ​រូប​នេះ​ហាក់​មាន​ភាព​ផុយ​ស្រួយ​នៅ​ឡើយ។

ថ្វី​ត្បិតតែ Joao Cancelo គឺ​ជា​ខ្សែការពារ​ដែល​ជំនាញ​នៅ​ខាង​ស្តាំ​ក៏ដោយ ប៉ុន្តែ​កីឡាករ​ឆ្នើម​រូប​នេះ នៅ​តែ​ប៉ិន​ប្រសប់​អាច​លេង​ជា​ខ្សែ​ការពារ​ឆ្វេង​បាន​ល្អ​ផង​ដែរ។ ជា​មួយ​នឹង​គុណ​សម្បត្តិ​របស់​កីឡាករ​សញ្ជាតិ​ព័រទុយហ្គាល់​រូប​នេះ ស្រប​ពេល​ដែល​បញ្ហាហិរញ្ញ​វត្ថុ​នៅ​តែ​គម្រាម​កំហែង​នោះ Barcelona ប្រហែល​ជា​មិន​អាច​មាន​លទ្ធភាព​ទិញ​ផ្ដាច់​កុងត្រា​របស់ Joao Cancelo ដែល​ក្លឹប Man City ទាមទារ​ចង់​បាន​ប្រហែល 26 លានផោន​នោះ​ឡើយ។

យោងតាម​របាយការណ៍​ពី Sport បាន​ឲ្យ​ដឹង​ថា ដើម្បី​ដោះស្រាយ​បញ្ហា​នេះ Barcelona អាច​នឹង​សម្រេច​ចិត្ត​ផ្តល់ Balde ជាផ្នែក​មួយ​នៃ​ការ​ដេញ​ថ្លៃ​របស់​ពួកគេ ដើម្បី​ទទួល​បាន Joao Cancelo។ លោក Pep Guardiola ដែល​ជា​គ្រូ​បង្វឹក​របស់ Man City អាច​នឹង​ពេញ​ចិត្ត​ជម្រើស​នេះ ខណៈ​ដែល​បច្ចុប្បន្ន​ក្រុមរ​បស់​គាត់​មាន​តែ Sergio Gomez ម្នាក់​ប៉ុណ្ណោះ ដែល​លេង​ជា​ខ្សែការពារ​ស្លាប​ឆ្វេង​តាំង​ពី​ដើម​មក ហើយ Josko Gvardiol និង Nathan Ake គឺ​ជា​ខ្សែការពារ​កណ្ដាល​ដែល​ទើប​នឹង​វិវត្តន៍​មក​លេង​ជា​ខ្សែការពារ​ស្លាប​ប៉ុណ្ណោះ។

ប្រភព: Sportsmole