Wolverhampton បដិសេធ​មិន​លក់ Pedro Neto ទៅ​ឲ្យ Arsenal

ក្លឹប Wolverhampton Wanderers ត្រូវ​បាន​គេ​រាយការណ៍​ថា មិន​មាន​ចេតនា​ក្នុង​ការ​លក់​ខ្សែ​ប្រយុទ្ធ​ស្លាប Pedro Neto នៅ​ក្នុង​ខែ​មករា​នេះ​ឡើយ ជា​ពិសេស​គឺ​ពួក​គេ​មិន​លក់​គេ​ទៅ​ឲ្យ Arsenal ដែល​កំពុង​ចាប់​អារម្មណ៍​ខ្លាំង​លើ​កីឡាករ​ឆ្នើម​រូប​នេះ​ឡើយ។

កីឡាករ​វ័យ 23 ឆ្នាំ​រូបនេះ​បាន​ផ្លាស់​ទៅ Molineux ដោយ​ផ្ទេរ​ពី​ក្លឹប Braga នៅ​រដូវក្តៅ​ឆ្នាំ 2019 ហើយ​គិត​ចាប់​តាំង​ពី​ពេល​នោះ​មក គាត់​បាន​បង្ហាញ​ខ្លួន 122 ប្រកួត​សម្រាប់ក្លឹប​បច្ចុប្បន្ន​របស់​ខ្លួន​នៅ​គ្រប់​ព្រឹត្តិការណ៍​នៃ​ការប្រកួត​ទាំង​អស់ ដោយ​ស៊ុត​បញ្ចូលទី​បាន 12 គ្រាប់ និង​បញ្ជូន​បាល់ឲ្យ​មិត្ត​រួម​ក្រុម​បាន​ចំនួន 22 ដង។

អ្វី​ដែល​កាន់​តែ​ពិសេស​ជាង​នេះ​ទៀត​នោះ Neto បាន​បង្ហាញ​ភាព​លេចធ្លោរ​កាន់​តែ​ខ្លាំង​នា​រដូវកាល 2023-2024 នេះ ដោយ​បាន​ក្លាយ​ជា​តួ​អង្គ​ដ៏​សំខាន់​ក្រោម​ការ​ដឹកនាំ​របស់​គ្រូ​បង្វឹក​លោក Gary O’Neil។ ទម្រង់​លេង​នៅ​ដើម​រដូវកាល​របស់ Neto ត្រូវ​បាន​គេ​មើល​ឃើញ​ថា មាន​ការ​ចាប់អារម្មណ៍​ខ្លាំង​ពី Arsenal ដែល​ពួក​គេ​បាន​បន្ត​ការ​តាម​ដាន​យ៉ាង​យក​ចិត្ត​ទុក​ដាក់​លើ​កីឡាករ​ឆ្នើម​រូប​នេះ និង​សង្ឃឹម​ថា អាច​នាំ​យក​គេ​ទៅ​ទឹកដី Emirates នា​ពេល​ឆាប់ៗ​ខាង​មុខ។

ទោះ​ជា​យ៉ាង​ណា​ក៏ដោយ បើ​យោង​តាម​សារព័ត៌មាន Daily Mirror បាន​ឲ្យ​ដឹង​ថា Wolves មិន​មាន​បំណង​ចែក​ផ្លូវ​គ្នា​ជាមួយ Neto ក្នុង​អំឡុង​ពេល​នៃ​ទីផ្សារ​ដោះដូរ​កីឡាករ​នា​ខែ​មករា​នេះ​ទេ ខណៈ​ដែល Manchester United ក៏​ចាប់​អារម្មណ៍​ចង់​បាន​គេ​ដូចគ្នា។ Neto នៅ​មាន​កុងត្រា​ជាមួយ Wolves រហូត​ដល់​រដូវ​ក្តៅឆ្នាំ 2027 ហើយ​គាត់​ត្រូវបាន​គេ​ជឿថា នឹង​សម្រេច​ចិត្ត​ដើរ​តាម​អ្វី​ដែល​ជា​គោលគំនិត​នៃ​ក្លឹប​បច្ចុប្បន្ន​របស់​ខ្លួន។

ប្រភព: Sportsmole