Pep Guardiola ថា ខ្លួន​នឹង​ស្វាគមន៍​ប្រសិន​បើ Rooney ចាប់​អារម្មណ៍ និង​ចង់​ធ្វើ​ជា​ជំនួយ​ការ​របស់​គាត់

លោក Pep Guardiola បាន​បង្ហាញ​ពី​ការ​ស្វាគមន៍​ចំពោះ​ឱកាស​នៃ​ការ​ធ្វើ​ការ​ជា​មួយ​នឹង​អតីត​វីរបុរស​បាល់​ទាត់​របស់​ក្លឹប​បិសាចក្រហម Manchester United គឺ​លោក Wayne Rooney នៅ​ក្លឹប​បច្ចុប្បន្ន​បរស់​ខ្លួន Manchester City។

ថ្វី​ត្បិតតែ​ធ្លាប់​ជា​កីឡាករ​របស់​បិសាចក្រហម​ប៉ុន្តែ Wayne Rooney ធ្លាប់​បាន​ពោលសរសើរ​ដល់ Pep Guardiola ថា​ជា​គ្រូ​បង្វឹក​ដ៏​ល្អ​បំផុត​ក្នុង​ពិភព​បាល់ទាត់ និង​បាន​សារភាព​ថា គាត់​បើក​ចំហរ​ចិត្ត​ក្នុង​ការ​ទៅ​ធ្វើ​ជា​គ្រូ​ជំនួយ​របស់ Pep នៅ​ Man City ទៀត​ផង។

ស្រប​ពេល​ជាមួយ​គ្នា​នោះ Pep Guardiola ក៏​បាន​បង្ហាញ​ពី​ការ​បើក​ចិត្ត​ចង់​ទទួល​អតីត​កីឡាករ​របស់​ក្លឹប​បិសាចក្រហម Manchester United រូប​នេះ​ដូច​គ្នា។ គ្រូ​បង្វឹក​របស់​ក្លឹប​មេឃខៀវ Manchester City បាន​និយាយ​តាមរយៈ BeanymanSports ថា៖ “គាត់​អាច​មក​ពេល​ណា​ក៏​បាន លើស​ពី​ការ​ស្វាគមន៍។ សម្រាប់​ទាំង​អស់​គ្នា​នៅ Man City វា​ពិត​ជា​សំខាន់​ណាស់ ប៉ុន្តែ​គាត់​គឺ​ជា​បិសាច​ក្រហម ដូចនេះ​គាត់​គឺ​ជាអ្នកគាំទ្រ​របស់ Man United។ ដូច្នេះ​ហើយ វា​ពិត​ជា​ល្អ​ណាស់​សម្រាប់​ពួក​យើង​ទាំង​អស់​គ្នា Wayne Rooney គឺ​ជា​កីឡាករ​ដ៏​អស្ចារ្យ​បំផុត​នៅ​ក្នុង​ប្រវត្តិសាស្ត្រ​របស់​ប្រទេស​នេះ (អង់គ្លេស)”។

គួរ​ដឹង​ផង​ដែរ​ថា ​បច្ចុប្បន្ន Wayne Rooney មិន​បាន​កាន់​កាប់​ការងារ​ណា​មួយ​ឡើយ ក្រោយ​ត្រូវ​បាន​ក្លឹប Birmingham City បណ្តេញ​ចេញ​ពី​តំណែង​ជា​គ្រូ​បង្វឹក​កាល​ខែ​មករា ដើម​ឆ្នាំ​កន្លង​ទៅ។ គាត់​តែងតែ​និយាយ​អំពី​បំណង​ប្រាថ្នា​របស់​ខ្លួន ដើម្បី​ក្លាយ​ជា​គ្រូ​បង្វឹក​ដែល​ដឹកនាំ​អតីត​ក្លឹប​ចាស់ Manchester United ប៉ុន្តែ​ជាក់​ស្ដែង​សមត្ថភាព​របស់​គាត់​នៅ​មាន​កម្រិត ហើយ​ប្រហែល​ជា​ពិបាក​ណាស់​ក្នុង​ការ​កាន់​ការងារ​ដ៏​ធំ​បែប​នេះ។

ប្រភព: Sportskeeda