បាល់ទាត់អន្តរជាតិ

ប្រទះឃើញអ្នកតំណាងរបស់លោក Hansi Flick មកមើលការប្រកួតរបស់ Barcelona

Published

3 months ago

February 26, 2024

Lee Lee

ក្លឹបអ្នកមានបុណ្យ Barcelona បានបន្តការងាររបស់ខ្លួនដើម្បីស្វែងរកគ្រូបង្វឹកថ្មី ឲ្យបានមុនរដូវកាលថ្មីចាប់ផ្ដើម ដើម្បីមកជំនួសតំណែងគ្រូបង្វឹកបច្ចុប្បន្នគឺលោក Xavi Hernandez។ ដោយឡែក យើងបានដឹងហើយថា Xavi បានប្រកាសចាកចេញពីតំណែងនៅចុងបញ្ចប់នៃរដូវកាលនេះ។

មានគ្រូបង្វឹកជាច្រើនត្រូវបានគេផ្សារភ្ជាប់ជាមួយនឹងការមកដឹកនាំនៅក្លឹបយក្សកាតាឡាន់ ខណៈដែលអតីតគ្រូបង្វឹករបស់ក្រុមជម្រើសជាតិអាឡឺម៉ង់លោក Hansi Flick ក៏ជាបេក្ខភាពដែលអាចមកកាន់ការងារថ្មីជំនួស Xavi ផងដែរ។ ប្រព័ន្ធផ្សព្វផ្សាយជាច្រើនបានអះអាងថា Hansi Flick នឹងមានភាគរយខ្ពស់បំផុត ក្នុងការក្លាយជាគ្រូបង្វឹកបន្ទាប់របស់ Barcelona។

លើសពីនេះទៅទៀត ថ្មីៗនេះមានសញ្ញាបង្ហាញមួយកាន់តែច្បាស់ ដោយគេបានប្រទះឃើញអ្នកតំណាងរបស់ Hansi Flick បានមកដល់ទឹកដីអេស្ប៉ាញ។ លោក Pini Zahavi ដែលត្រូវបានគេដឹងថាជាអ្នកតំណាងរបស់គ្រូបង្វឹកវ័យ 59 ឆ្នាំនោះ ត្រូវបានគេប្រទះឃើញនៅក្នុងការប្រកួតកាលពីប៉ុន្មានថ្ងៃមុនដែល Barcelona បានយកឈ្នះ Getafe ក្នុងលទ្ធផល 4-0។ ជាមួយនឹងរឿងបែបនេះ គេអាចសន្មត់បានថា Hansi Flick ប្រាកដជានឹងមកដឹកនាំនៅ Barcelona រដូវកាលក្រោយ។