បាល់ទាត់អន្តរជាតិ
Bayern Munich កំពុងកំណត់គោលដៅលើ Robertson ដើម្បីមកជំនួសកន្លែងរបស់ Alphonso Davies
ក្លឹបម្ចាស់ជើងឯកអាឡឺម៉ង់ Bayern Munich អាចនឹងធ្វើការផ្ទេរដ៏គួរឲ្យភ្ញាក់ផ្អើលមួយសម្រាប់ Andy Robertson របស់ហង្សក្រហម Liverpool ប្រសិនបើ Alphonso Davies ចាកចេញពីក្លឹបនៅចុងបញ្ចប់នៃរដូវកាលនេះ។
យ៉ាងណាមិញ Alphonso Davies នឹងផុតកំណត់កុងត្រារបស់ខ្លួនជាមួយ Bayern Munich នៅចុងបញ្ចប់នៃរដូវកាលក្រោយ ហើយគាត់ត្រូវបានគេនិយាយថា បានយល់ព្រមរួចហើយក្នុងការចាកចេញទៅចូលរួមជាមួយក្លឹប Real Madrid នៅរដូវក្តៅខាងមុខ។
តាមពិតទៅ Bayern Munich មិនចង់បាត់បង់ខ្សែការពារឆ្នើមរបស់ខ្លួនរូបនេះឡើយ ប៉ុន្តែពួកគេបានបរាជ័យក្នុងការចងចិត្ត និងមិនអាចបន្តកុងត្រាថ្មីជាមួយ Alphonso Davies បាន។ បន្ទាប់ពីលក់ Lucas Hernandez ទៅឲ្យ PSG ហើយ Davies អាចនឹងចាកចេញដែរនោះ Bayern Munich នៅសល់ខ្សែការពារឆ្វេងតែមួយគត់គឺ Raphael Guerreiro ខណៈដែលខ្សែការពារស្តាំ Noussair Mazraoui, Sacha Boey និង Bouna Sarr សុទ្ធតែមានបញ្ហារបួសនៅរដូវកាលនេះ។
យោងតាមកាសែត Daily Mail បានរាយការណ៍ថា គ្រូបង្វឹកលោក Thomas Tuchel បានប្រាប់ឲ្យក្លឹបរបស់ខ្លួនផ្ទេរ Robertson ដែលអាចក្លាយជាអ្នកស្នងតំណែងដ៏សាកសមសម្រាប់ Alphonso Davies។ ខ្សែការពារសញ្ជាតិស្កុតឡេន Andy Robertson ត្រូវបានគេចាត់ទុកជាខ្សែការពារឆ្នើមម្នាក់នាពេលបច្ចុប្បន្ន។ អតីតកីឡាកររបស់ក្លឹប Hull City រូបនេះ បានលេងឲ្យ Liverpool តាំងពីឆ្នាំ 2017 ដោយស៊ុតបញ្ចូលទីបាន 9 គ្រាប់ និង Assists បាន 64 ដង ក្នុងការបង្ហាញខ្លួនសរុប 282 ប្រកួត។
ប្រភព: Sportsmole