បាល់ទាត់អន្តរជាតិ
Pau Cubarsi ត្រៀមបន្តកុងត្រាថ្មីរយៈពេលវែងជាមួយ Barcelona ស្របពេលដែលក្លឹបធំៗជាច្រើនចាប់អារម្មណ៍លើរូបគេ
កីឡាករ Pau Cubarsi ត្រូវបានគេរាយការណ៍ថា មានបំណងចុះកុងត្រាថ្មីរយៈពេលវែងជាមួយ Barcelona ស្របពេលដែលគេកំពុងទទួលបានការចាប់អារម្មណ៍ជាខ្លាំងពីក្លឹបបិសាចក្រហម Manchester United និង Paris Saint-Germain។ ខ្សែការពារសញ្ជាតិអេស្ប៉ាញរូបនេះទើបនឹងមានវ័យ 17 ឆ្នាំ កាលពីខែមករានេះតែប៉ុណ្ណោះ។
ទោះជាយ៉ាងណាក៏ដោយ កីឡាករវ័យក្មេងរូបនេះ ត្រូវបានគ្រូបង្វឹកប្រើប្រាស់ជាខ្សែការពារកណ្តាលដ៏សំខាន់នៅក្នុងក្រុម។ មិនតែប៉ុណ្ណោះ Pau Cubarsi ជាខ្សែការពារក្មេងបំផុតដែលត្រូវបានកោះហៅឲ្យចូលរួមជាមួយក្រុមជម្រើសជាតិអេស្ប៉ាញថែមទៀតផង។
របាយការណ៍មួយដែលត្រូវបានលេចឡើងកាលពីខែមុនបានអះអាងថា ទម្រង់លេងរបស់ Pau Cubarsi បានទាក់ទាញភ្នែករបស់ក្លឹបតោខៀវ Chelsea ជាខ្លាំង ហើយពួកគេកំពុងគិតអំពីការចុះហត្ថលេខាលើខ្សែការពារដែលកំពុងឡើងជើងរូបនេះ ស្របពេលដែល Barcelona ក៏កំពុងប្រឈមមុខនឹងវិបត្តិហិរញ្ញវត្ថុផងដែរ។
យ៉ាងណាក៏ដោយ គេបានដឹងថា បើទោះបីជា Barcelona ស្ថិតក្នុងស្ថានភាពមួយដែលពួកគេកំពុងព្យាយាមកែលម្អជំហរហិរញ្ញវត្ថុរបស់ខ្លួនក៏ដោយ ពួកគេនឹងរៀបចំផែនការសម្រាប់អនាគត ដែលប្រសើរជាងការលក់កីឡាករវ័យក្មេងដែលមានទេពកោសល្យរបស់ខ្លួន។ យោងតាម Mundo Deportivo បានឲ្យដឹងថា កិច្ចព្រមព្រៀងកុងត្រាថ្មីនឹងឈានដល់ការសម្រេចជាផ្លូវការណ៍នាពេលឆាប់ៗខាងមុខ ហើយ Cubarsi នឹងការបន្តនៅ Camp Nou រយៈពេលវែងបន្តទៀត។
ប្រភព: Sportsmole