ផ្លូវការណ៍: Atletico Madrid ប្រកាស​ពី​ការ​ចាកចេញ​របស់ Luis Suarez នៅ​ចុង​បញ្ចប់​នៃ​រដូវកាល​នេះ

កាល​ពី​ថ្ងៃ​អាទិត្យ​ម្សិល​មិញ​នេះ ក្លឹប​យក្ស​នៅ​អេស្ប៉ាញ Atletico Madrid បាន​ប្រកាស​នៅ​លើ​ផេក​ផ្លូវ​ការណ៍​របស់​ខ្លួន​ថា ខ្សែ​ប្រយុទ្ធ​ចាស់​វស្សា Luis Suarez នឹង​ចាក​ចេញ​ពី​ក្លឹប​នៅ​ចុង​បញ្ចប់​នៃ​រដូវកាល​នេះ ដែល​ការ​ប្រកាស​បាន​ធ្វើ​ឡើង​មុន​ការ​ប្រកួត​របស់​ពួក​គេ​ជាមួយ​នឹង Sevilla។

Luis Suarez បាន​ជួយ​ក្លឹប​ឲ្យ​ឈ្នះ​ពាន​មួយ​កាល​ពី​ឆ្នាំ​មុន ហើយ​គាត់​គឺ​ជា​ចំណែក​មួយ​ដ៏​សំខាន់​របស់​ក្លឹប​ក្នុង​ការ​ឈ្នះ​ពាន​លីគ​កំពូល​អេស្ប៉ាញ​នេះ​ផង​ដែរ។ ប៉ុន្តែ​ក្រោយ​ពេល​ដែល​មាន​វត្តមាន​របស់​ខ្សែ​ប្រយុទ្ធ​ជា​ច្រើន​នោះ Luis Suarez មិន​សូវ​បាន​បង្ហាញ​សមត្ថភាព​ពេញ​លេញ​ដូច​រដូវកាល​មុន​ឡើយ។

នៅ​រដូវកាល​នេះ Luis Suarez ស៊ុត​បញ្ចូល​ទី​បាន 11 គ្រាប់ និង​បញ្ចូល​បាល់​ឲ្យ​មិត្ត​រួម​ក្រុម​បាន 3 ដង ក្នុង​ការ​បង្ហាញ​ខ្លួន 33 ប្រកួត។ ខ្សែ​ប្រយុទ្ធ​វ័យ 35 ឆ្នាំ​រូប​នេះ នឹង​ចាកចេញ​ពី​ក្លឹប​ក្នុង​នាម​ជា​កីឡាករ​ដែល​គ្មាន​តម្លៃ​ខ្លួន ព្រោះ​កុងត្រា​របស់​គាត់​បាន​ផុត​កំណត់​ទៅ​ហើយ​ជា​មួយ Atletico Madrid។

ខ្សែ​ប្រយុទ្ធ Luis Suarez មិន​ទាន់​ត្រូវ​បាន​គេ​ឲ្យ​ដឹងថា នឹង​ចូល​រួម​ជា​មួយ​ក្លឹប​ណា​នៅ​ឡើយ​ទេ ប៉ុន្តែ​គាត់​បាន​បដិសេធ​មិន​ចរចា​ជា​មួយ​ក្លឹប​នៅ​លីគ​កំពូល​អាមេរិច MLS ឡើយ ពោល​គឺ​គាត់​ចង់​បន្ត​អា​ជីព​ជា​មួយ​ក្លឹប​ធំៗ​នៅ​តំបន់​អ៊ឺរ៉ុប​បន្ត​ទៀត។ ក្លឹប​ដែល​ខ្សែ​ប្រយុទ្ធ​នេះ​ធ្លាប់​លេង​មាន​ដូចជា Ajax, Liverpool និង Barcelona។

ដោយ​ឡែក ខ្សែបម្រើ Hector Herrera ក៏​ត្រូវ​បាន​គេ​រាយការណ៍​ផង​ដែរ​ថា ត្រៀម​នឹង​ចាកចេញ​​នៅ​​រដូវក្តៅនេះផង​ដែរ ខណៈ​ដែល​គាត់​គ្រោង​នឹង​ចូល​រួម​ជាមួយ​ក្លឹប Houston Dynamo ដែល​ជា​ក្លឹប​ស្ថិត​នៅ​លីគ​កំពូល​អាមេរិច។

ប្រភព: Goal