David Moyes ចាប់​អារម្មណ៍​ចង់​យក McTominay មក​ជំនួស​កន្លែង​របស់ Declan Rice

យោងតាម​ការ​អះអាង​ចុង​ក្រោយ​មួយ​បាន​ឲ្យ​ដឹង​ថា គ្រូ​បង្វឹក​របស់​ក្លឹប​ញញួរ​ធំ West Ham United លោក David Moyes ត្រូវ​បាន​គេ​រាយការណ៍​ថា កំពុង​ជម្រុញ​ឲ្យ​ក្លឹប​របស់​គាត់​ចុះ​ហត្ថលេខា​ផ្ទេរ​ខ្សែបម្រើ Scott McTominay របស់​ក្លឹប​បិសាចក្រហម Manchester United ក្នុង​អំឡុង​ពេល​នៃ​ទីផ្សារ​ដោះដូរ​កីឡាករ​រដូវក្តៅ​នេះ។

យ៉ាង​ណា​មិញ អនាគត​របស់​កីឡាករ​វ័យ 26 ឆ្នាំ​រូប​នេះ​នៅ Old Trafford បច្ចុប្បន្ន​កំពុង​ស្ថិត​ក្នុង​ការ​សង្ស័យ ដោយ​គេ​ជឿថា ក្លឹប​បិសាច​ក្រហម Manchester United កំពុង​រង​ចាំ​មើល​ការ​ដេញ​ថ្លៃ​ពី​ក្លឹប​ផ្សេងៗ ដែល​ចង់​បាន​ខ្សែ​បម្រើ​កណ្ដាល​រូប​នេះ ព្រោះ​បច្ចុប្បន្ន​គេ​ក៏​មិន​មែន​ជា​កីឡាករ​សំខាន់ និង​ជា​ជម្រើស​ដំបូង​របស់​លោក Erik ten Hag ដែរ។

McTominay ចូល​លេង​បាន 39 ប្រកួត​សម្រាប់​បិសាចក្រហម កាល​ពី​រដូវកាល​មុន ប៉ុន្តែ​គាត់​បាន​ក្លាយ​ជា​ជម្រើស 11 នាក់​ដំបូង​​ត្រឹមតែ 10 ដង​ប៉ុណ្ណោះ នៅ​ការ​ប្រកួត Premier League ដោយមាន Casemiro, Bruno Fernandes, Christian Eriksen និង Fred ជា​ជម្រើស​មុន​គាត់។ កាល​ពី​ខែ​មករា​កន្លង​ទៅ Newcastle United ត្រូវ​បាន​ផ្សារភ្ជាប់​ជាមួយ​នឹង McTominay ហើយ​ត្រូវ​បាន​គេ​ជឿថា ពួក​គេ​នៅ​តែ​បន្ត​ការ​ពិចារណា​ផ្ទេរ​កីឡាករ​វ័យ 26 នៅ​រដូវក្តៅ​នេះ។

យោងតាម​របាយការណ៍​ដែល​ចុះ​ផ្សាយ​ថ្មីៗ​នេះ​ដោយ The Sun បាន​ឲ្យ​ដឹង​ថា លោក David Moyes គឺ​ជា​មនុស្ស​ម្នាក់​ដែល​ពេញ​ចិត្ត​ខ្លាំង​ចំពោះ​សមត្ថភាព​របស់ McTominay ហើយ​គ្រូ​បង្វឹក​រូប​នេះ​ជឿជាក់​ថា គេ​នឹង​ជំនួស​ការ​បាត់បង់​ដ៏​ធំ​មួយ​ដែល Declan Rice បាន​ចាកចេញ​នៅ​រដូវក្តៅ​នេះ។

ប្រភព: Sportsmole