បាល់ទាត់អន្តរជាតិ
Ramos និង Jordi Alba នឹងទៅលេងជាមួយ Messi នៅ Inter Miami
យោងតាមសារព័ត៌មាន SPORT បានឲ្យដឹងថា តារាឆ្នើម Lionel Messi អាចនឹងក្លាយជាមិត្តរួមក្រុមនឹងគ្នាជាថ្មីម្ដងទៀតជាមួយ Sergio Ramos និងខ្សែការពារស្លាប Jordi Alba នៅក្លឹប Inter Miami ដែលស្ថិតនៅលីគកំពូលនៃសហរដ្ឋអាមេរិច MLS។ ទាំង Ramos និង Jordi Alba បច្ចុប្បន្នភ្នាក់ងាររបស់គាត់មិនបានស្វះស្វែងរកក្លឹបថ្មីឡើយ ព្រោះពួកគេបានកំណត់គោលដៅរួចហើយថា នឹងចូលរួមជាមួយ Inter Miami។
Lionel Messi បានប្រកាសកាលពីខែមុនថា គាត់នឹងបន្តអាជីពបាល់ទាត់របស់គាត់នៅ MLS ហើយក្រោយមកទៀត Sergio Busquets ក៏បានផ្ទេរទៅតាមកីឡាករវ័យ 36 ឆ្នាំរូបនេះដែរ។ យ៉ាងណាមិញ ថ្មីៗនេះ Gerardo Martino ត្រូវបានតែងតាំងជាគ្រូបង្វឹកថ្មីរបស់ក្លឹប Inter Miami ខណៈដែលពួកគេកំពុងសម្លឹងមើលការពង្រឹងក្រុមបន្ថែម ដែលកំពុងយ៉ាប់យ៉ឺនខ្លាំងនៅក្នុងការប្រកួតលីគ។
យ៉ាងណាមិញ Messi ធ្លាប់បានលេងជាមួយគ្នានៅលើទីលានប្រកួតចំនួន 46 ដង ជាមួយខ្សែការពារឆ្នើម Sergio Ramos ក្នុងកំឡុងពេលពួកគេនៅ PSG។ ថ្វីត្បិតតែធ្លាប់ជាគូប្រជែង ដែលមើលមុខគ្នាមិនចំនៅ La Liga ក៏ដោយ អ្នកទាំងពីរបានបង្កើតទំនាក់ទំនងដ៏ស្និទ្ធស្នាលនៅប្រទេសបារាំង ហើយទំនងពួកគេអាចនឹងចូលនិវត្តន៍នៅសហរដ្ឋអាមេរិចជាមួយគ្នា ដែលជាការចំណាយពេលវេលាចុងក្រោយនៃជាជីពរបស់ខ្លួនផងដែរ។
ប្រភព: Sportskeeda