Maguire និង Scott McTominay នឹង​មិន​ទាន់​ចាកចេញ​ពី​បិសាចក្រហម​នៅ​រដូវក្ដៅ​នេះ​ទេ

ខ្សែការពារ Harry Maguire និង​ខ្សែបម្រើ Scott McTominay ត្រូវ​បាន​គេ​រាយការណ៍​ថា នឹង​ស្នាក់​នៅ​ជាមួយ Manchester United បន្ត​ទៀត ដែល​ផ្ទុយ​ពី​ពាក្យ​ចចាម​អារ៉ាម​កន្លង​មក​ដែល​លើក​ឡើង​ថា អ្នក​ទាំង​ពីរ នឹង​ចាកចេញ​ពី Old Trafford នៅ​ក្នុង​ទីផ្សារដោះដូរ​កីឡាករ​រដូវ​ក្តៅនេះ។

ទាំង Harry Maguire និង Scott McTominay សុទ្ធតែ​ធ្លាក់​ចុះ​នូវ​ទម្រង់​លេង និងលែង​ក្លាយ​ជា​កីឡាករ​សំខាន់​របស់​បិសាចក្រហម កាល​ពី​រដូវកាល​មុន។ សម្រាប់​ខ្សែការពារ​សញ្ជាតិ​អង់គ្លេស Harry Maguire ស្ទើរតែ​មិន​បាន​លេង​ទាំង​ស្រុង​ទៅ​ហើយ ក្នុង​ប្រព័ន្ធ​ខ្សែការពារ​កណ្តាល​របស់​លោក Erik ten Hag ខណៈ​ដែល McTominay ក៏​មិន​ដូច​ខុស​គ្នា​ដែរ ព្រោះ​គាត់​ជា​ជម្រើស​ខ្សែបម្រើ​ដែល​នៅ​ក្រោយ Bruno Fernandes, Casemiro និង Christian Eriksen។

យ៉ាង​ណា​មិញ Manchester United ត្រូវ​បាន​គេ​រំពឹង​ថា នឹង​ចុះ​ហត្ថលេខា​លើ​ខ្សែបម្រើ​ម្នាក់​ទៀត មុន​ពេល​ទីផ្សារ​ដោះដូរ​កីឡាករ​បិទ ដោយ​ម្នាក់​នោះ​អាច​ជា Sofyan Amrabat របស់ Fiorentina, Aurelien Tchouameni របស់ Real Madrid រឺ Leon Goretzka របស់ Bayern Munich។

ថ្វី​ត្បិត​តែ​ការ​ប្រជែង​តំណែង​លេង​កាន់​តែ​លំបាក​ក៏​ដោយ យោងតាម​របាយការណ៍​ពី Football Insider បាន​ឲ្យ​ដឹង​ថា Harry Maguire និង Scott McTominay មិន​ត្រូវ​បាន​បង្ខំ​ឲ្យ​ចាក​ចេញ​ពី Man United នៅ​រដូវក្តៅ​នេះ​ទេ។ កីឡាករ​ទាំងពីរ​រូប​នេះ​អាច​បន្ត​ស្នាក់​នៅ​ក្លឹប​បច្ចុប្បន្ន​របស់​ខ្លួន​បន្ត​ទៀត ប្រសិន​បើ​គាត់​មិន​ទាន់​ចង់​ចាកចេញ បើ​ទោះ​បី​ជា​បិសាចក្រហម​ដឹង​ថា ការ​លក់​កីឡាករ​ទាំង​ពីរ​រូប​នេះ អាច​ជួយ​ឲ្យ​ពួក​គេអាច​ប្រមូល​ថវិការ​ទៅ​ចុះ​ហត្ថលេខា​លើ​កីឡាករ​ថ្មីៗ​បន្ថែម​ទៀត​ក៏​ដោយ។

ប្រភព: Sportsmole