បាល់ទាត់អន្តរជាតិ
Neymar កំពុងបើកភ្លើងខៀវ ក្នុងការចាកចេញទៅអារ៉ាប៊ីសាអូឌីត
ខ្សែប្រយុទ្ធរបស់ក្លឹប Paris Saint-Germain គឺកីឡាករ Neymar Jr ត្រូវបានគេរាយការណ៍ថា បានបើកភ្លើងខៀវសម្រាប់ការផ្ទេរនារដូវក្តៅនេះ ទៅកាន់ក្លឹបយក្សនៅអារ៉ាប៊ីសាអូឌីត Al-Hilal។ កីឡាករសញ្ជាតិប្រេស៊ីលរូបនេះ បានបង្ហាញខ្លួនជាផ្នែកមួយដ៏សំខាន់នៅតំបន់ប្រយុទ្ធរបស់ PSG ដោយចាប់ដៃគូជាមួយ Lionel Messi និង Kylian Mbappe កាលពីរដូវកាលមុន ប៉ុន្តែគាត់មិនបានបង្ហាញខ្លួនពេញមួយរដូវកាលឡើយ ដោយសារតែរបួសកជើងធ្ងន់ធ្ងរ។
ខ្សែប្រយុទ្ធស្លាប Neymar Jr នៅមានកុងត្រាជាមួយ PSG រហូតដល់ឆ្នាំ 2025 ដែលដើមឡើយត្រូវបានគេមើលឃើញថា គាត់នឹងបន្តស្នាក់នៅទឹកដីបារាំងយ៉ាងហោចណាស់ 1 រដូវកាលទៀត ខណៈដែល Messi បានចាកចេញទៅទឹកដីអាមេរិក ដោយចូលរួមជាមួយ Inter Miami ហើយ Kylian Mbappe ត្រៀមចាកចេញទៅ Real Madrid។
ទោះបីជាយ៉ាងណាក៏ដោយ ពេលនេះ Mbappe ត្រូវបានគេដឹងថា កំពុងបើកចំហចំពោះការបន្តកុងត្រា ហើយ Neymar បែរជាត្រៀមចាកចេញទៅវិញ។ យោងទៅតាម L’Equipe បានរាយការណ៍ថា Neymar ពេលនេះ បានយល់ព្រមលើការផ្ទេរទៅ Al-Hilal ហើយ។ អតីតកីឡាកររបស់ក្លឹប Barcelona រូបនេះ នឹងចុះហត្ថលេខាលើកុងត្រារយៈពេលពីរឆ្នាំជាមួយ Al-Hilal ហើយការចុះកុងត្រានោះគាត់នឹងទទួលបានប្រាក់ពលកម្ម 150 លានផោនក្នុងមួយឆ្នាំ។
ប្រភព: Sportsmole