Man City ទទួល​យក​សំណើរ​លក់ Aymeric Laporte ទៅ​ឲ្យ​ក្លឹប Al-Nassr

ក្លឹ​ប​មេឃខៀវ Manchester City ត្រូវ​បាន​គេ​រាយការណ៍​ថា បាន​ទទួល​យក​សំណើរ​ពី​ក្លឹប Al-Nassr ដែល​ស្ថិត​នៅ Saudi Pro League លើ​ការ​ផ្ទេរ​ខ្សែការពារ Aymeric Laporte ហើយ។ កីឡាករ​វ័យ 29 ឆ្នាំ​រូបនេះ​បាន​ចំណាយ​ពេល 5 ឆ្នាំ​កន្លះ នៅ Etihad ដោយ​បង្ហាញ​ខ្លួន​សរុប​បាន 179 ប្រកួត។

ខ្សែការពារ Aymeric Laporte ដែល​ជា​អតីត​កីឡាករ​របស់​ក្លឹប Athletic Bilbao រូប​នេះ ធ្លាប់​បាន​ឈ្នះពាន​រង្វាន់​ចំនួន 12 ពាន​ជា​មួយ Man City ដែល​ក្នុង​នោះ​មាន​ពាន​សំខាន់ Premier League ចំនួន 5 និង UEFA Champions League 1។ ទន្ទឹម​នឹង​នេះ​ដែរ Laporte ក៏​ជា​មនុស្ស​ម្នាក់​ដែល​ស្ថិត​ក្នុង​បញ្ជី​កីឡាករ​ឈ្នះ​ពាន​បី​ក្នុង​មួយ​រដូវកាល​របស់​លោក Pep Guardiola កាល​ពី​រដូវកាល​មុន​ដែរ ប៉ុន្តែ​គាត់​បាន​បង្ហាញ​ខ្លួន​ត្រឹមតែ 20 ប្រកួត​ប៉ុណ្ណោះ ដោយ​ស្ថិត​ក្នុង​ជម្រើស​បន្ទាប់​ពី Ruben Dias, John Stones, Manuel Akanji និង Nathan Ake។

កីឡាករ​របស់​ក្រុម​ជម្រើស​ជាតិ​អេស្ប៉ាញ​រូប​នេះ ត្រូវ​បាន​គេ​ផ្សារ​ភ្ជាប់​ជា​មួយ​នឹង​ការ​ចាកចេញ​ពី Man City តាំង​ពី​ខែ​មករា​មក​ម្ល៉េះ ហើយ​គាត់​កាន់​តែ​ពិបាក​ថែម​ទៀត​នៅ​ពេល​ដែល​ថ្មីៗ​នេះ​ក្លឹប Man City ទើប​នឹង​ចុះ​ហត្ថលេខា​លើ​បេក្ខភាព​ខ្សែការពារ​ចំណូល​ថ្មី Josko Gvardiol។

មាន​ក្លឹប​ជា​ច្រើន​នៅ​អឺរ៉ុប​ត្រូវ​បាន​គេដឹង​ថា ចាប់​អារម្មណ៍​លើ Laporte ហើយ​ក្លឹប​ទាំង​នោះ​មាន​ទាំង Arsenal ផង​ដែរ ដោយ​ពួក​គេ​ចង់​បាន​ខ្សែការពារ​រូប​នេះ​មក​ជំនួស Jurrien Timber ដែល​ទើប​នឹង​រងរបួស​កាល​ពី​ពេល​ថ្មីៗ​នេះ។ ទោះ​បី​ជា​យ៉ាង​ណា​ក៏​ដោយ យោងតាម​អ្នក​កាសែត The Athletic លោក David Ornstein បាន​អះអាង​ថា ថ្មីៗ​នេះ​ក្លឹប​អារ៉ាប៊ីសាអូឌីត Al-Nassr បាន​ចាប់​អារម្មណ៍​កាន់​តែ​ខ្លាំង​លើ Laporte ហើយ​សំណើរ​របស់​ពួក​គេ​ត្រូវ​បាន​យល់​ព្រម​ដោយ Man City ផង​ដែរ។ តម្លៃ​នៃ​សំណើរ​របស់ Al-Nassr នៅ​មិន​ទាន់​ដឹង​នៅ​ឡើយ​ទេ ប៉ុន្តែគេ​គិត​ថា Man City នឹង​លក់​ខ្សែការពារ​រូប​នេះ​ក្នុង​តម្លៃ​យ៉ាង​ហោច​ណាស់ 30 លានផោន។

ប្រភព: Sportsmole