បាល់ទាត់អន្តរជាតិ
De Bruyne ថា កីឡាកររបស់បិសាចក្រហមរូបនេះ ជាខ្សែបម្រើល្អបំផុតម្នាក់ប្រចាំ Premier League
ខ្សែបម្រើ Kevin De Bruyne របស់ក្លឹបមេឃខៀវ Manchester City បានចាត់ទុក Bruno Fernandes របស់ក្លឹប Manchester United ថាជាខ្សែបម្រើល្អបំផុតម្នាក់ប្រចាំនៅទឹកដី Premier League។ និយាយទៅកាន់ Sky Sports កាលពីពេលថ្មីៗនេះ De Bruyne បានដាក់ចំណាត់ថ្នាក់ Fernandes ល្អជាង James Maddison របស់ Tottenham Hotspur និងល្អជាង Martin Odegaard របស់ Arsenal ផងដែរ។
យ៉ាងណាមិញ បន្ទាប់ពីការចាត់ទុក និងជ្រើសរើសយក Bruno Fernandes ថាជាខ្សែបម្រើដ៏ល្អម្នាក់ប្រចាំក្របខណ្ឌកំពូលរបស់អង់គ្លេសហើយនោះ De Bruyne ក៏ត្រូវបានគេសួរសំណួរអំពីការសម្រេចចិត្តជ្រើសរើសរបស់គាត់ផងដែរ ហើយកីឡាករសញ្ជាតិបែលហ្ស៊ិករូបនេះបាននិយាយដោយខ្លីថា “ព្រោះខ្ញុំគិតថាគាត់ (Bruno Fernandes) គឺជាម៉ាស៊ីននៃភាពច្នៃប្រឌិត”។
បច្ចុប្បន្ន Kevin De Bruyne ក៏ជាមនុស្សម្នាក់ដែលគេចាត់ទុកជាកីឡាករឆ្នើមបំផុតផងដែរ ដោយកាលពីរដូវកាលមុនគាត់បានក្លាយជាតួអង្គដ៏សំខាន់ដែលបង្កើតឱកាសដល់ភាពជោគជ័យរបស់ក្រុមនៅលើទីលានប្រកួតចំនួន 98 ដង។ សម្រាប់ការប្រកួតនៅ Premier League តារាឆ្នើមរូបនេះបានរួមចំណែក 16 Assists ខណៈដែល Bruno Fernandes មានស្ថិតិ Assists ត្រឹមតែពាក់កណ្តាលគាត់ប៉ុណ្ណោះ។
ប្រភព: Dailypost NG