ប្រមូល​ល្អៗ​អស់​ហើយ!!! ពេល​នេះ Man City ចង់​បាន Evan Ferguson ថែម​ម្នាក់​ទៀត

ក្លឹប​មេឃខៀវ Manchester City ត្រូវ​​បាន​​គេ​រាយការណ៍​ថា ជា​ក្លឹប​មួយ​ក្នុង​ចំណោម​ក្លឹប​ជា​ច្រើន​ទៀត​ដែល​កំពុង​ស្វែង​រក​ឱកាស​ក្នុង​ការ​​ផ្ទេរ សម្រាប់​ខ្សែ​ប្រយុទ្ធ Evan Ferguson របស់ Brighton។ យ៉ាង​ណា​មិញ កីឡាករ​​វ័យ 18 ឆ្នាំ​រូប​នេះ កំពុង​ត្រូវ​បាន​គេ​មើល​ឃើញ​ថា នឹង​ក្លាយ​ជា​អនា​គត​ដ៏​ត្រចះ​ត្រចង់​ប្រចាំ​លីគ​កំពូល​របស់​អង់គ្លេស Premier League។

Evan Ferguson បាន​ចាប់​អាជីព​បាល់ទាត់​លើក​ដំបូង​របស់​គាត់​ដោយ​លេង​ជា​យុវជន​របស់​ក្លឹប Bohemians ហើយ​ត្រឹមតែ​រយៈ​ពេល​មួយ​រដូវកាល​ប៉ុណ្ណោះ Brighton បាន​មើល​ឃើញ​ពី​សមត្ថភាព​ដ៏​ល្អ​របស់​គាត់ ហើយ​បាន​ចុះ​ហត្ថលេខា​លើ​កីឡាករ​សញ្ជាតិ​អៀរឡង់​រូប​នេះ ក្នុង​ខែសីហា ឆ្នាំ 2021។

ដំបូង​ឡើយ Evan Ferguson បាន​លេង​ឲ្យ​ឈុត​យុវជន​របស់ Brighton U21 និង​បាន​ធ្វើ​រឿង​ដ៏​អស្ចារ្យ​នៅ​ទីនោះ ដោយ​ស៊ុតបញ្ចូលទី​បាន 18 គ្រាប់ ក្នុង​ការ​បង្ហាញ​ខ្លួន 39 ប្រកួត។ បន្ទាប់​មក​ទៀត គាត់​បាន​ចូលរួម​​ជា​មួយ​ឈុត​ធំ ដោយ​នៅ​រដូវកាល​មុន​គាត់​បាន​ស៊ុត​បញ្ចូលទី 10 គ្រាប់ និង Assists ចំនួន 3 ដង ក្នុង​ការ​បង្ហាញ​ខ្លួន 25 ប្រកួត។

គ្មាន​កីឡាករ​វ័យ​ក្មេង​ណា​ម្នាក់​នៅ​អង់គ្លេស​ដែល​វិវត្តន៍​ខ្លួន​បាន​លឿន​ដូច Evan Ferguson ឡើយ ហើយ​ស្រប​ពេល​ជាមួយ​គ្នា​នោះ មាន​ក្លឹប​ជា​ច្រើន​បាន​ចាប់​អារម្មណ៍​លើ​គាត់។ យោងតាម inews បាន​ឲ្យ​ដឹង​ថា ក្លឹប​ម្ចាស់​ជើង​ឯក Man City និង​ក្លឹប​ជា​ច្រើន​ទៀត​នៅ​ក្របខ័ណ្ឌ Premier League កំពុង​តាមដាន​យ៉ាង​យក​ចិត្ត​ទុក​ដាក់​លើ Ferguson និង​បាន​ត្រៀម​គោលដៅ​ផ្ទេរ​ខ្សែ​ប្រយុទ្ធ​រូប​នេះ នៅ​ខែ​មករា ពេល​ដែល​ទីផ្សារ​ដោះដូរ​កីឡាករ​បើក​ឡើង​វិញ។

ប្រភព: Sportsmole