Lamine Yamal ធ្លាប់​ត្រូវ​បាន Man City ទាក់ទង​ចង់​បាន​កាល​ពី​ដើម​ឆ្នាំ​នេះ

ក្លឹប​អ្នក​មាន​បុណ្យ Barcelona បាន​បង្ហើប​ឲ្យ​ដឹង​ថា Manchester City ធ្លាប់​បាន​តាម​ចែចង់​កីឡាករ​វ័យ​ក្មេង​របស់​ពួក​គេ Lamine Yamal កាល​ពី​ខែ​កុម្ភៈ ដើម​ឆ្នាំ​នេះ។ របាយការណ៍​ពី Marca បាន​រាយ​ការណ៍​ថា ក្រុម​របស់​លោក Pep Guardiola បាន​ធ្វើ​ការ​ទាក់ទង​ទៅ​កាន់​ខ្សែ​ប្រយុទ្ធ​វ័យ​ក្មេង​រូប​នេះ មុន​ពេល​គេ​ត្រូវ​បាន​ប្រូម៉ូត​ឡើង​មក​លេង​ជា​មួយ​ឈុត​ធំ​ជា​លើក​ដំបូង​របស់ Barcelona។

យ៉ាង​ណា​មិញ​របាយការណ៍​នេះ​បាន​អះអាង​បន្ថែម​ទៀត​ថា Man City ចង់​ចុះ​ហត្ថលេខា​លើ​កីឡាករ​ដ៏​មាន​ទេពកោសល្យ​រូបនេះ ហើយ​បញ្ជូន​គាត់​ឲ្យ​ខ្ចី​ជើង​ទៅ​ក្លឹប Girona ជា​កន្លែង​ដែល​គាត់​អាច​ទទួល​បាន​បទពិសោធន៍​ជាមួយ​ក្រុម​ឈុតធំ​លើក​ដំបូង។ គួរ​ដឹង​ផង​ដែរ​ថា Manchester City គឺ​ជា​អ្នក​ពាក់ព័ន្ធ​ដ៏​សំខាន់​នៅ Girona ព្រោះពួក​គេ​បានទិញភាគហ៊ុន 44.3% នៅ​ក្នុង​ក្លឹប ក្នុង​ឆ្នាំ 2017 ហើយ​កាល​ពី​មុនៗ ពួក​គេ​ធ្លាប់​បាន​ខ្ចីកីឡាករ​ជាច្រើន​នៅ​ទីនោះ​ផង​ដែរ។

ទោះ​ជា​យ៉ាង​ណា​ក៏ដោយ វាហាក់​បី​ដូចជា Lamine Yamal មិន​សូវ​ចាប់​អារម្មណ៍​លើ​ការ​ដូរ​ក្លឹប ហើយ​បាន​ជ្រើសរើស​បន្ត​នៅ Barcelona។ មិន​យូរ​ប៉ុន្មាន​គាត់​ត្រូវ​បាន​ប្រូម៉ូត​ឡើង​មក​លេង​ជា​មួយ​ឈុត​ធំ និង​ត្រូវ​បាន​អ្នកគាំទ្រ​ជា​ច្រើន​កោតសរសើរ ជា​មួយ​នឹង​ទម្រង់​លេង​ដ៏​ល្អ សាកសម​ជា​គ្រាប់ពេជ្រ​នា​ពេល​អនាគត​របស់ Barcelona។ លើស​ពី​នេះ​ទៅ​ទៀត ថ្មីៗ​នេះ​គាត់​ត្រូវ​បាន​កោះហៅ​ឲ្យ​ចូល​ក្រុម​ជម្រើស​ជាតិ​អេស្ប៉ាញ និង​រក​បាន​គ្រាប់​បាល់​ដំបូង​របស់​ខ្លួន​ផង​ដែរ ក្នុង​នាម​ជា​កីឡាករ​វ័យ​ក្មេង​បំផុត។

ប្រភព: Barcablaugranes