បាល់ទាត់អន្តរជាតិ
បិសាចក្រហមកំពុងពិចារណាផ្ទេរកីឡាករចាស់វស្សាមួយរូបរបស់ Bayern Munich
ក្លឹបបិសាចក្រហម Manchester United ត្រូវបានគេរាយការណ៍ថា កំពុងពិចារណាចំពោះឱកាស និងលទ្ធភាពនៃការចុះហត្ថលេខាលើខ្សែបម្រើប្រយុទ្ធរបស់ក្លឹប Bayern Munich គឺកីឡាករ Thomas Muller នៅក្នុងអំឡុងពេលទីផ្សារដោះដូរកីឡាករខែមករាដើមឆ្នាំខាងមុខនេះ។
យ៉ាងណាមិញ នៅដើមរដូវកាលនេះលោក Erik ten Hag ត្រូវបានគេជឿថា កំពុងស្ថិតក្រោមសម្ពាធយ៉ាងខ្លាំងនៅ Old Trafford ហើយផ្នែកមួយនៃទម្រង់លេងរបស់ក្លឹបបិសាចក្រហម គឺការខ្វះខាតនៅតំបន់ប្រយុទ្ធ។ ទោះបីជាយ៉ាងណាក៏ដោយ ឥឡូវនេះ Man United រកបាន 15 ពិន្ទុ ពីការប្រកួតទាំង 6 លើកចុងក្រោយរបស់ពួកគេនៅក្នុងក្របខ័ណ្ឌ Premier League ដែលការទទួលជ័យជម្នះចុងក្រោយគឺបានយកឈ្នះ 3-0 ទៅលើ Everton កាលពីម្សិលមិញ។
ដោយឡែក កាលពីពេលថ្មីៗនេះបិសាចក្រហមត្រូវបានផ្សារភ្ជាប់ជាមួយនឹងការចង់បាន Antoine Griezmann ប៉ុន្តែកីឡាករសញ្ជាតិបារាំងរូបនេះ ត្រូវបានគេដឹងថា មិនមានចំណាប់អារម្មណ៍ក្នុងការផ្លាស់មកទឹកដីអង់គ្លេសឡើយ។
យោងតាមរបាយការណ៍ពី BILD បានអះអាងថា Manchester United នៅតែព្យាយាមស្វែងរកខ្សែប្រយុទ្ធម្នាក់ជាចាំបាច់ ហើយ Thomas Muller កំពុងស្ថិតក្នុងរ៉ាដារបស់ពួកគេ។ កីឡាករចាស់វស្សាសញ្ជាតិអាឡឺម៉ង់រូបនេះ នឹងផុតកុងត្រាជាមួយក្លឹបបច្ចុប្បន្នរបស់ខ្លួននៅឆ្នាំក្រោយ ហើយគាត់ក៏ប្រហែលជាកំពុងពិចារណាក្នុងការចាកចេញពី Bayern Munich ដែលជាទ្រនំខ្លួនធ្លាប់រស់នៅតាំងពីនៅឈុតយុវជនមកផងដែរ។
ប្រភព: Sportsmole