បញ្ជាក់​ពី ស្ថានភាព​របួស​របស់​ខ្សែប្រយុទ្ធ​ឆ្នើម Son Heung-min

ខ្សែប្រយុទ្ធ Son Heung-min របស់​ក្លឹប​មាន់ខ្នាយមាស Tottenham Hotspur ហាក់​បី​ដូចជា​មាន​សង្ឃឹម​ថា មិន​រង​របួស​ធ្ងន់ធ្ងរ​ប៉ុន្មាន​ទេ ក្នុង​ការ​ប្រកួត​ទល់​នឹង West Ham United កាល​ពី​រំលង​អាធ្រាត​យប់មិញ។

កីឡាករ​វ័យ 31 ឆ្នាំ​រូបនេះ តែងតែ​មាន​វត្តមាន​ក្នុង​ជម្រើស​ដំបូង​ជា​និច្ច ក្រោម​ការ​ដឹកនាំ​របស់​លោក Ange Postecoglou។ នៅ​រដូវកាល​នេះ Son Heung-min បាន​រួមចំណែក​ស៊ុត​បញ្ចូលទី​ចំនួន 9 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន 2 ដង ក្នុង​ការ​បង្ហាញ​ខ្លួន 15 ប្រកួត ក្នុង​​ក្របខ័ណ្ឌ Premier League។

ទោះ​ជា​យ៉ាង​ណា​ក៏​ដោយ ក្នុង​ការ​បរាជ័យ 2-1 ជាមួយ West Ham United កាល​ពី​ម្សិលមិញ​នេះ ខ្សែប្រយុទ្ធ​ឆ្នើម ​Son Heung-min មិន​បាន​លេង​ពេញ​តង់រហូត​ដល់​ចប់​ការ​ប្រកួត​នោះ​ទេ ដោយ​នៅ​នាទីទី 87 គាត់​ត្រូវ​បាន​ប្ដូរ​ចេញ និង​ជំនួស​មក​វិញ​ដោយ Alejo Veliz។ នៅ​ពេល​ចាកចេញ​ទៅ​អង្គុយ​លើ​កៅអី​បម្រុង Son Heung-min ហាក់​ដូចជា​បង្ហាញ​អាការៈ​ឈឺ​ចាប់ ខណៈ​ដែល​បុគ្គលិក​ពេទ្យ​របស់​ក្លឹប​ក៏​បាន​មើល​គាត់​ផង​ដែរ។

ក្រោយ​មក​ទៀត Son Heung-min បាន​ផ្តល់​ព័ត៌មាន​ចុង​ក្រោយ​អំពី​ស្ថានភាព​នៃ​របួស​របស់​គាត់​ទៅ​កាន់​ប្រព័ន្ធ​ផ្សព្វផ្សាយ​ដោយ​និយាយ​ថា គាត់​មាន​អារម្មណ៍​ឈឺ​ឆ្អឹង​ខ្នង​ខាង​ក្រោយ ដោយ​សារ​ត្រូវ​បាល់​មួយ​ទំហឹង ហើយ​រងចាំ​ខាង​គ្រូ​ពេទ្យ​ពិនិត្យលើ​បញ្ហា​នេះ។ ដោយ​ឡែក​ប៉ុន្មាន​ម៉ោង​បន្ទាប់ មាន​របាយការណ៍​ពី The Express បាន​ឲ្យ​ដឹង​ថា កីឡាករ​សញ្ជាតិ​កូរ៉េ​ខាង​ត្បូង​រូប​នេះ​មិន​មាន​របួស​អ្វី​ធ្ងន់ធ្ងរ​ទេ ហើយ​គាត់​នឹង​មាន​លក្ខណៈ​សម្បត្តិ​គ្រប់​គ្រាន់​ក្នុង​ការ​ប្រកួត Premier League នៅ 3 ថ្ងៃ​បន្ទាប់​ដែល Tottenham Hotspur នឹង​ត្រូវ​ប្រកួត​ជាមួយក្លឹប Newcastle United ដែល​ជា​ក្រុម​ខ្លាំង​មួយ​នៅ​អង់គ្លេស។

ប្រភព: Sportsmole