ក្លឹប​ធំៗ 3 នៅ PL កំពុង​ចាប់​អារម្មណ៍​ខ្លាំង​លើ​ប្អូន​ប្រុស​របស់ Jude Bellingham

ក្លឹប​ហង្សក្រហម Liverpool, Chelsea និង Arsenal ត្រូវ​បាន​គេ​រាយការណ៍​ថា បាន​បញ្ជូន​អ្នក​សង្កេត​ការណ៍​របស់​ខ្លួន​ឲ្យ​ទៅ​មើល និង​តាម​ដាន​ពី​ទម្រង់​លេង​របស់​ខ្សែបម្រើ Jobe Bellingham របស់​ក្លឹប Sunderland។ យ៉ាង​ណា​មិញ កីឡាករ​វ័យ 18 ឆ្នាំ​រូបនេះ បាន​ក្លាយ​ជា​តួអង្គ​ដ៏​សំខាន់​នៃ​ក្លឹប​របស់​ខ្លួន ដោយ​នេះ​គ្រាន់​តែ​ជា​រដូវកាល​ដំបូង​របស់​គាត់​ប៉ុណ្ណោះ។

ខ្សែបម្រើ​ឆ្នើម​ដែល​ត្រូវ​ជា​ប្អូន​ប្រុស​របស់ Jude Bellingham បាន​ចូលរួម​ជាមួយ​ក្លឹប Sunderland ដោយ​ផ្ទេរ​ចេញ​ពី​ក្លឹប​កុមារភាព​របស់​គាត់ Birmingham City កាល​ពី​ដើម​រដូវក្ដៅ​កន្លង​ទៅ។ ចាប់តាំង​ពី​បាន​ចូល​រួម​ជាមួយ​ក្លឹប Sunderland កីឡាករ​វ័យ​ក្មេង​រូបនេះ​បាន​បង្ហាញ​ខ្លួន​ក្នុង​នាម​ជា​កីឡាករ​ជម្រើស​ដំបូង​របស់​ក្រុម​ចំនួន 20 ប្រកួត​មក​ហើយ ក្នុង​ចំណោម​ការ​ប្រកួត​លីគទាំង 22 លើក​របស់​ក្លឹប។

Jobe Bellingham ភាគច្រើន​ត្រូវ​បាន​ប្រើប្រាស់​ក្នុង​តួនាទី​ជា​ខ្សែ​បម្រើ​ប្រយុទ្ធ ហើយ​គិត​មក​ទល់​នឹង​ពេល​នេះ គាត់​ស៊ុត​បញ្ចូលទី​បាន 4 គ្រាប់​ហើយ​នៅ Championship រដូវ​កាល​នេះ និង​ស៊ុត​បញ្ចូល​ទី​លើក​ចុង​ក្រោយ​ក្នុង​ជ័យជម្នះ 1-0 ទៅ​លើ Leeds United ផង​ដែរ កាល​ពី​ថ្ងៃទី 12 ខែ​ធ្នូ​កន្លង​ទៅ។

ជា​មួយ​នឹង​ទម្រង់​លេង​ដ៏​លេចធ្លោរ​នេះ Jobe Bellingham ត្រូវ​បាន​គេ​មើល​ឃើញ​ថា នឹង​ក្លាយ​ជា​តារា​បាល់ទាត់​ដ៏​លេច​ធ្លោរ​ដូច​បង​ប្រុស​របស់​គាត់​ដែរ ហើយ​ថ្មីៗ​នេះ យោងតាម​អ្នក​កាសែត​លោក Ekrem Konur បាន​ឲ្យ​ដឹង​ថា ក្លឹប​ហង្សក្រហម Liverpool, Chelsea និង Arsenal កំពុង​តាមដាន​យ៉ាង​យក​ចិត្ត​ទុក​ដាក់​ទៅ​លើ​គាត់ ដើម្បី​ស្វែងរក​ឱកាស​ផ្ទេរ​កីឡាករ​ដែល​អាច​មាន​អនាគត​ដ៏​ភ្លឺ​ស្វាង​រូប​នេះ។

ប្រភព: Sportsmole