លេច​មុខ​ក្លឹប​យក្ស 2 នៅ​អេស្ប៉ាញ ចាប់​អារម្មណ៍​ចង់​បាន Kalvin Phillips

ក្លឹប​អ្នក​មាន​បុណ្យ Barcelona និង Atletico Madrid ត្រូវ​បាន​គេ​រាយការណ៍​ថា កំពុង​ត្រៀម​ចូលរួម​ក្នុង​ការ​ចរចា​ដើម្បី​ចុះ​ហត្ថលេខា​ខ្ចី​ជើង លើ​ខ្សែបម្រើ​កណ្តាល​របស់​ក្លឹប Manchester City គឺ​កីឡាករ Kalvin Phillips នៅ​ក្នុង​ទីផ្សារ​ដោះដូរ​កីឡាករ​នា​ខែ​មករា​នេះ។

យ៉ាង​ណា​មិញ កីឡាករ​សញ្ជាតិ​អង់គ្លេស​រូប​នេះ គ្រោង​នឹង​ចាកចេញ​ពី Man City ក្នុង​លក្ខខ័ណ្ឌ​ខ្ចី​ជើងក្នុង​អំឡុង​ខែ​មករា​ដើម​ឆ្នាំ​នេះ ហើយ​គាត់​កំពុង​ត្រូវ​បាន​ផ្សារភ្ជាប់​យ៉ាង​ខ្លាំង​ជាមួយ​នឹង​ក្លឹប​មួយ​ចំនួន​នៅ Premier League។ ក្លឹប Crystal Palace, West Ham United និង Newcastle United សុទ្ធ​តែ​ចាប់​អារម្មណ៍​ចង់​បាន Kalvin Phillips ខណៈ​ដែល​មាន​ការ​អះអាង​ខ្លះ​បាន​និយាយ​ថា Tottenham Hotspur ក៏​កំពុង​សម្លឹង​មើល​ពី​ស្ថានភាព​របស់ខ្សែបម្រើ​រូប​នេះ​ដូច​គ្នា។

ដោយ​ឡែក​យោងតាម​សារព័ត៌មាន The Telegraph បាន​ឲ្យ​ដឹង​ថា អនាគត​របស់ Kalvin Phillips នឹង​ត្រូវ​ទៅ​ទីណា​នោះ នឹង​សម្រេច​ចិត្ត​នៅ​សប្តាហ៍​ក្រោយ ហើយ​គាត់​ក៏​អាច​មាន​ជម្រើស​ក្នុង​ការ​ផ្លាស់​ទៅ La Liga សម្រាប់​រយៈ​ពេល​ពាក់​កណ្តាល​រដូវកាល​នេះ​ផង​ដែរ ដោយ​ទាំង Barcelona និង Atletico Madrid សុទ្ធ​តែ​ចង់​បាន Kalvin Phillips។

ប្រភព: Sportsmole