Neymar ប្រែប្រួល​រូប​រាង 360 ដឺក្រេ ខណៈ​ដែល​គេ​ទើប​នឹង​ប្រទះ​ឃើញ​គាត់​នៅ​ក្លឹប​រាត្រី​មួយ​កន្លែង

ខ្សែប្រយុទ្ធ​សញ្ជាតិ​ប្រេស៊ីលរបស់​ក្លឹប​បាល់ទាត់​អារ៉ាប៊ីសាអូឌីត Al-Hilal គឺ Neymar Jr ថ្មីៗ​នេះ​បាន​បង្ហាញ​ខ្លួន​ជា​សាធារណៈ​នៅ​ក្នុង​ក្លឹប​រាត្រី​មួយ​កន្លែង។ កីឡាករ​វ័យ 31 ឆ្នាំ រូប​នេះ ត្រូវ​បាន​គេ​ចាប់​អារម្មណ៍​មើល​ឃើញ​ថា មាន​សភាព​ប្រែប្រួល​រូប​រាង​ខុស​ពី​មុន​យ៉ាង​ខ្លាំង ដោយ​មាន​មុខ​ធំ​ជាង​មុន និង​ហាក់​ឡើង​គីឡូ​ខ្លាំង។

យ៉ាង​ណា​មិញ Neymar Jr បច្ចុប្បន្ន​កំពុង​សម្រាក​ពី​លើ​ទីលាន​បាល់ទាត់​ហើយ ដោយ​សារ​បញ្ហា​របួស ហើយ​គាត់​នឹង​អវត្ត​មាន​រហូត​ដល់​ខែ​សីហា ឆ្នាំ 2024 ដោយ​សារ​របួស​ហែក​សរសៃ​ពួរ​ធ្ងន់ធ្ងរ ក្នុង​ការ​ប្រកួត​ជម្រុះ World Cup 2026 ទល់​នឹង​ក្រុម​ជម្រើស​ជាតិ​អ៊ុយរូហ្គាយ។

របួស​លើក​នេះ វា​ជា​របួស​ដែល​ត្រូវ​បាន​គេ​ចាត់ទុក​ថា ធ្ងន់ធ្ងរ​បំផុត​ក្នុង​អាជីព​របស់​ខ្សែប្រយុទ្ធ​ឆ្នើម​រូប​នេះ។ បន្ទាប់​ពី​ការ​វះកាត់​ហើយ Neymar បាន​ឡើង​ទម្ងន់​ខ្លាំង ប្រហែល​ជា​ដោយ​សារ​គាត់​មិន​បាន​ហាត់​ប្រាណ រឺ​បញ្ចេញ​សកម្មភាព​ពាក់ព័ន្ធ​នឹង​បាល់ទាត់។ Neymar Jr ដែល​ទើប​នឹង​ចូលរួម​ជាមួយ Al-Hilal កាល​ពី​ដើម​រដូវកាល​នេះ បាន​បង្ហាញ​ខ្លួន​ទើប​តែ 5 ប្រកួត​ប៉ុណ្ណោះ​ឲ្យ​ក្លឹប​របស់​ខ្លួន ដោយ​រួម​ចំណែក​ស៊ុត​​បញ្ចូល​ទី​បាន 1 ​គ្រាប់ និង​​បញ្ជូន​បាល់​ឲ្យ​មិត្ត​រួម​ក្រុម​បាន 3 ​ដង។

ប្រភព: Telecomasia