បិសាចក្រហម អាច​នឹង​ចុះ​ហត្ថលេខា​លើ Youssef En-Nesyri

ក្លឹប​បិសាចក្រហម Manchester United ត្រូវ​បាន​គេ​រាយការណ៍​ថា កំពុង​សម្លឹង​មើល​ការ​ចុះ​ហត្ថលេខា​ដើម្បី​នាំយក Youssef En-Nesyri ទៅ​កាន់​ទឹកដី Old Trafford នៅ​រដូវក្តៅ​នេះ។ បិសាចក្រហម បាន​បង្វែរ​ការ​ចាប់​អារម្មណ៍​របស់​ពួក​គេ​មក​លើ​ខ្សែ​ប្រយុទ្ធ​រូប​នេះ បន្ទាប់​ពី​បាន​ដឹង​ថា Sevilla ក៏​ហាក់​មាន​បំណង​ចង់​លក់ Youssef En-Nesyri ផង​ដែរ។

ក្លឹប​បិសាចក្រហម កំពុង​ព្យាយាម​ពង្រឹង​ក្រុម​របស់​ពួក​គេ​នៅ​រដូវក្តៅ​នេះ ខណៈ​ដែល​ថ្នាក់ដឹកនាំ​របស់​ក្លឹប​គឺ​លោក Sir Jim Ratcliffe ក៏​មាន​ផែនការ ដើម្បី​ចំណាយ​ប្រាក់​ចុះ​ហត្ថលេខា​នាំ​យក​កីឡាករ​ចំណូល​ថ្មី​យ៉ាង​ហោច​ណាស់​ចំនួន 4 នាក់។ ជា​ការ​ពិត​ណាស់ Man United បាន​បញ្ចប់​យុទ្ធនាការ​រដូវកាល​មុន (2023/2024) ដោយ​រក​បាន​គ្រាប់​បាល់​សរុប 57 គ្រាប់​ប៉ុណ្ណោះ ពី​ការ​ប្រកួត​ចំនួន 38 ប្រកួត​របស់​ពួកគេ​ក្នុង​ក្របខណ្ឌ​លីគ។

ជាមួយ​នឹង​ចំនួន​គ្រាប់​បាល់ 57 គ្រាប់​នេះ​ដែរ បាន​ធ្វើ​ឲ្យ​ពួកគេ​ក្លាយ​ក្រុម​ដែល​ស៊ុតបញ្ចូលទី​ទាប​បំផុត ក្នុង​ចំណោម​ក្រុម​ផ្សេង​ទៀត​នៅ Premier League។ បិសាចក្រហម បាន​ស៊ុត​បញ្ចូលទី​លើស​ពី Luton Town ត្រឹមតែ 5 គ្រាប់ ខណៈ​ដែល Luton Town ជា​ក្រុម​ដែល​ស្ថិត​ក្នុង​តំបន់​កាត់​ចោល។

ឥឡូវនេះ​យោងតាម​របាយការណ៍​ពី Estadio Deportivo បាន​ឲ្យ​ដឹង​ថា Man United នឹង​ចុះហត្ថលេខា​លើ​កីឡាករ​វ័យ 27 ឆ្នាំ Youssef En-Nesyri ស្រប​ពេល​ដែល​កីឡាករ​រូប​នេះ​នឹង​មិន​ចាំ​បាច់​ឲ្យ​ពួក​គេ​ចំណាយ​ប្រាក់​ច្រើន​ដើម្បី​ចុះ​ហត្ថលេខា​លើ​គេ​នោះ​ទេ។

ក្លឹប Sevilla នឹង​លក់ Youssef En-Nesyri ប៉ុន្តែ​មិន​អាច​មាន​តម្លៃ​ខ្ពស់​នោះ​ឡើយ ព្រោះ​ខ្សែ​ប្រយុទ្ធ​រូប​នេះ​នឹង​ផុត​កុងត្រា​នៅ​រដូវ​កាលក្រោយ។ បើ​ពួក​គេ​មិន​ព្យាយាម​លក់​គេ​ចេញ​នៅ​រដូវក្ដៅ​នេះ​ទេ នោះ Youssef En-Nesyri នឹង​ចាកចេញ​ដោយ​គ្មាន​តម្លៃ​ខ្លួន​នៅ​ឆ្នាំ 2025។

ប្រភព: Teamtalk