បាល់ទាត់អន្តរជាតិ

Man City ដាក់គោលដៅលើ Hakimi ប្រសិនបើ Kyle Walker ចាកចេញ

Published

10 months ago

June 25, 2023

Lee Lee

របាយការណ៍ចុងក្រោយមួយបានឲ្យដឹងថា គ្រូបង្វឹករបស់ក្លឹបមេឃខៀវ Manchester City លោក Pep Guardiola ត្រូវបានគេរាយការណ៍ថា កំពុងដាក់គោលដៅនៃការចង់បានរបស់ខ្លួនលើ Achraf Hakimi របស់ក្លឹប Paris Saint-Germain ប្រសិនបើ Kyle Walker សម្រេចចិត្តចាកចេញពីក្លឹប។

ដោយបានប្រើប្រាស់ John Stones ក្នុងតួនាទីខុសពីជំនាញពិតប្រាកដដែលជាខ្សែការពារកណ្ដាល នៃរដូវកាល 2022-2023 លោក Pep Guardiola បានសារភាពថា Kyle Walker មិនអាចលេង នៅក្នុងប្រព័ន្ធទម្រង់លេងរបស់គាត់បានឡើយ ហើយក៏ធ្វើឲ្យមានការសង្ស័យអំពីអនាគតរបស់កីឡាករសញ្ជាតិអង់គ្លេសរូបនេះនៅ Etihad Stadium ផងដែរ។

កីឡាករវ័យ 33 ឆ្នាំរូបនេះ ខកខានមិនបានស៊ុតបញ្ចូលទី រឺ Assist អ្វីឡើយក្នុងក្របខ័ណ្ឌ Premier League កាលពីរដូវកាលមុន។ គាត់នៅមានកុងត្រាជាមួយក្លឹបបច្ចុប្បន្នរហូតដល់ឆ្នាំ 2024 ប៉ុន្តែថ្មីៗនេះ Kyle Walker ត្រូវបានផ្សារភ្ជាប់ជាមួយនឹងការផ្ទេរទៅកាន់ក្លឹបយក្សអាឡឺម៉ង់ Bayern Munich។

ពេលនេះ Man City កំពុងស្វែងរកបេក្ខភាពថ្មីដើម្បីមកជំនួស Kyle Walker ស្របពេលដែលរបាយការណ៍ជាច្រើនបានអះអាងថា អតីតកីឡាកររបស់ Tottenham Hotspur រូបនេះ បានត្រៀមខ្លួនជាស្រេចទៅហើយ ក្នុងការចាកចេញទៅទឹកដីអាឡឺម៉ង់។ ដោយឡែកកាសែត Marca បានរាយការណ៍ថា Hakimi គឺជាជម្រើសទី 1 របស់លោក Pep Guardiola ដើម្បីមកជំនួសកន្លែងលេងរបស់ Kyle Walker។ ទាំងគុណភាព និងល្បឿនរបស់ខ្សែការពារស្ដាំទាំងពីររូបនេះ គឺមិនចាញ់គ្នាទេ ប៉ុន្តែ Hakimi ប្រសើរជាង ព្រោះគាត់មានអាយុតិចជាង Kyle Walker រហូតដល់ 9 ឆ្នាំ។