រឿង​រ៉ាវ​ដ៏​គួរ​ឲ្យ​អស់​សំណើច​មួយ​ចំនួន​ដែល​អ្នក​មិន​ធ្លាប់​ដឹង​ពី Lautaro Martinez

បច្ចុប្បន្ន​នេះ បើ​អ្នក​ទាំង​អស់​គ្នា​និយាយ​ដល់​ខ្សែ​ប្រយុទ្ធ រឺ​កីឡាករ​ឆ្នើម​ប្រចាំ​ក្រុម​យក្ស​អ៊ីតាលី Inter Milan នោះ​គេ​នឹង​នឹក​ឃើញ Lautaro Martinez មុន​គេ។ កីឡាករ​សញ្ជាតិ​អាហ្សង់ទីន​រូប​នេះ គឺ​ជា​កូន​សោរ​ដ៏​សំខាន់ នៃ​ភាព​ជោគជ័យ​របស់ Inter Milan ក្នុង​រយៈពេល​ប៉ុន្មាន​រដូវកាល​ចុង​ក្រោយ​នេះ។

Lautaro Martinez កើត​នៅ​ថ្ងៃទី 22 ខែ​សីហា ឆ្នាំ 1997 ក្នុង​ទីក្រុង Bahia Blanca ប្រទេស​អាហ្សង់ទីន។ គាត់​បាន​ចាប់​ផ្តើម​លេង​បាល់ទាត់​នៅ​ក្លឹប​ក្នុង​ស្រុក​កំណើត​របស់​ខ្លួន​គឺ Liniers។ បន្ទាប់​ពី​បង្ហាញ​ភាព​លេច​ធ្លោរ​ខ្លាំង​ក្លឹប Racing បាន​ចុះ​ហត្ថលេខា​ជាមួយ Martinez នៅ​ខែ​មករា ឆ្នាំ 2014 និង​បាន​បង្ហាញ​ខ្លួន​ជា​កីឡាករ​អាជីព​ពេញ​លេញ​ជា​លើក​ដំបូងនា​រដូវកាល​ឆ្នាំ 2015។ បន្ត​មក​ទៀត នៅ​ឆ្នាំ 2018 ខ្សែ​ប្រយុទ្ធ​ឆ្នើម​រូប​នេះ ក៏​បាន​ផ្លាស់​មក​ចូលរួម​ជាមួយ​ក្លឹប Inter Milan រហូត​ដល់​បច្ចុប្បន្ន។

យ៉ាង​ណា​មិញ ក្រៅ​ពី​ប្រវត្តិត្រួសៗ​របស់ Lautaro Martinez គាត់​ក៏​នៅ​មាន​រឿង​រ៉ាវ​ប្លែកៗ​ដ៏​គួរ​ឲ្យ​ចាប់​អារម្មណ៍​ផង​ដែរ។ ខាង​ក្រោម​នេះ ក្រុម​ការងារ​យើង​នឹង​លើក​​មក​បង្ហាញ​នូវ​ចំណុច​មួយ​ចំនួន​ដែល​អ្នក​ទាំង​អស់​គ្នា​មិន​ធ្លាប់​បាន​ដឹងអំពី Lautaro Martinez។

1. ដើរ​តាម​គន្លង​របស់​ឪពុក៖

ឪពុក​របស់ Lautaro Martinez គឺ Mario Martinez ក៏​ជា​កីឡាករ​បាល់ទាត់​អាជីព​ដែរ។ ឪពុក​របស់​គាត់​កើត​​នៅ​ឆ្នាំ 1972 លេង​ជា​ខ្សែការពារ​ឆ្វេង​នៅ​ក្លឹប Nacional B (បាល់ទាត់​នៅ​លីគ​លំដាប់​ទី 2 របស់​អាហ្សង់ទីន) និង​លេង​ឲ្យ​ក្លឹប​ផ្សេងៗ​ជា​ច្រើន​ទៀត​ផង​ដែរ។

2. Lautaro Martinez នឹង​ក្លាយ​ជា​កីឡាករ​បាល់​បោះ ប្រសិន​បើ​មិនមែន​ជា​កីឡាករ​បាល់ទាត់

នៅ​ក្នុង​បទ​សម្ភាសន៍​ជាមួយ El Grafico ខ្សែ​ប្រយុទ្ធ​រូប​នេះ​បាន​សារភាព​ថា គាត់​ស្រឡាញ់​កីឡា​បាល់បោះ និង​ថែម​ទាំង​និយាយ​ថា គាត់​នឹង​ជ្រើសរើស​អាជីព​ជា​កីឡាករ​បាល់បោះ ប្រសិន​បើ​គាត់​មិន​អាច​ក្លាយ​ជា​កីឡាករ​បាល់ទាត់​ដូច​សព្វ​ថ្ងៃ​នេះ​ទេ។

3. ធ្លាប់​ត្រូវ​បាន​បដិសេធ​មិន​ទទួល​យក​ពី​ក្លឹប Boca Juniors

ខណៈ​ពេល​ដែល​គាត់​បញ្ចប់​ការ​ហ្វឹកហាត់​ជាមួយ​ឈុត​យុវជន​របស់​ក្លឹប Liniers ខ្សែ​ប្រយុទ្ធ​រូប​នេះ ក៏​ធ្លាប់​បាន​ព្យាយាម​ទៅ​សាកល្បង​ធ្វើ​តេស្ត​ជា​មួយ​ក្លឹប និង​សាលា​បាល់ទាត់​ធំៗ​មួយ​ចំនួន​នៅ​ក្នុង​ប្រទេស​អាហ្សង់ទីន រួម​ទាំង Boca Juniors ផង​ដែរ។ ប៉ុន្តែ​ដោយ​សារ​តែ​​កាយសម្បទារ​​របស់​គាត់​នៅ​មាន​កម្រិត​ក្រោម​ការ​ចង់​បាន​របស់​ក្លឹប​អាហ្សង់ទីន​មួយ​នេះ ក្តី​សង្ឃឹម​របស់ Lautaro Martinez នៅ​ក្នុង​វ័យ 15 ឆ្នាំ​ត្រូវ​បាន​រលាយ។

4. និមិត្ត​រូប (Idol) របស់ Lautaro Martinez

ក្នុង​នាម​ជា​ជនជាតិ​អាហ្សង់ទីន និមិត្ត​រូប រឺ Idol របស់ Martinez មិន​មែន​ជា​កីឡាករ​ដូច​ជា Diego Maradona, Sergio Aguero, Gabriel Batistuta, Hernan Crespo រឺ Gonzalo Higuain នោះ​ទេ ប៉ុន្តែ​គាត់​បាន​ស្រឡាញ់ និង​ចាត់​ទុក​ខ្សែ​ប្រយុទ្ធ​សញ្ជាតិ​កូឡុំប៊ី​ឈ្មោះ Radamel Falcao ជា​កីឡាករ​សំណព្វ​ចិត្ត​របស់​ខ្លួន។

5. ចាប់​ផ្ដើម​ចាក់សាក់​នៅ​អាយុ 14 ​ឆ្នាំ

មិន​ខុស​ពី​កីឡាករ​ជា​ច្រើន​ទៀត Martinez ក៏​​ជា​អ្នក​ដែល​ស្រឡាញ់​ការ​​សាក់​រូប​ផង​ដែរ ដោយ​ដៃ​ឆ្វេង​របស់​គាត់​ទាំង​ស្រុង មាន​ស្នាម​សាក់។ ទោះ​ជា​យ៉ាង​ណា​ក៏​ដោយ គាត់​បាន​ចាប់​ផ្ដើម​សាក់​លើក​ដំបូង នៅ​ពេល​ដែល​គាត់​មាន​អាយុ​ត្រឹមតែ 14 ឆ្នាំ ប៉ុណ្ណោះ ហើយ​សាក់​នោះ​គឺ​ជា​ការ​រំលឹក​នឹកគុណ​ទៅ​ដល់​ជីតា​របស់​គាត់។

6. ធ្លាប់​បដិសេធ Real Madrid ក្នុង​ឆ្នាំ 2015

ដើរ​តាម​គន្លង​កីឡាករ​ឆ្នើម​របស់​អាហ្សង់ទីន​ដូចជា Sergio Aguero និង Gonzalo Higuain ជា​ដើម Martinez បាន​ចាប់​ផ្តើម​ទទួល​បាន​ការ​ទាក់ទាញ​ចំណាប់​អារម្មណ៍​ពី​ក្លឹប​កំពូលៗ​របស់​អឺរ៉ុប បន្ទាប់​ពី​ស៊ុត​បញ្ចូលទី​បាន 53 គ្រាប់ ក្នុង​ការ​បង្ហាញ​ខ្លួន 64 ប្រកួត នៅ​ក្លឹប Racing។ ក្លឹប Racing និង Real Madrid ធ្លាប់​បាន​ចរចា​គ្នា​លើ​ព្រមព្រៀង​មួយ ក្នុង​ឆ្នាំ 2015 ដើម្បី​ទិញ Martinez ប៉ុន្តែ​កីឡាករ​វ័យក្មេង​រូប​នេះបាន​បដិសេធ។

7. ឈ្មោះ​ហៅ​ក្រៅ

ដោយ​សារ​តែ​ជំនាញ​របស់ Martinez ក្នុងការ​តស៊ូ​ដ៏​ខ្លាំងក្លា, ភាព​អត់ធ្មត់ និង​គុណភាព​នៅ​លើ​ទីលាន គាត់​ទទួល​បាន​រហ័ស្សនាម​ថា “El Toro” ដែល​ជា​ឈ្មោះ​ហៅ​ក្រៅ​របស់​គាត់ ដោយ​ក្នុង​ភាសា​អេស្ប៉ាញ​មាន​ន័យ​ថា គោឈ្មោល​ឡើង​ក។

ប្រភព: GOAL